.gif)
1-р хороо
Баянгол дүүргийн 1 дүгээр хороо нь анх 1965 онд Октябрийн районы Орон сууц гудамжны 13 дугаар хороо нэртэй байгуулагдаж, 250 гаруй өрх, 800 орчим хүн амтай, дан, давхар 25 байр, нутаг дэвсгэрийн 100 гаруй байгууллагатай байжээ. 1992 онд “Монгол улсын засаг захиргаа нутаг дэвсгэрийн нэгж, түүний удирдлагын тухай хууль” батлагдан, Октябрийн район нь Баянгол, Сонгинохайрхан дүүрэг болж хоёр хуваагдахад Баянгол дүүргийн 1 дүгээр хороо шинээр байгуулагдсан.
Баянгол дүүргийн 1 дүгээр хороо нь Төмөр замын тосгоны төв хэсэгт байрлаж, баруун талаараа Баянгол дүүргийн 4, 2 дугаар хороо, зүүн талаараа Баянгол дүүргийн 3 дугаар хороотой, урд талаараа Дунд голын эргээр Хан-Уул дүүрэгтэй хил залган оршдог. 99.4 га нутаг дэвсгэрт 4891 өрхийн 17478 гаруй хүн ам оршин суудаг, хүн амын 73.8%-ийг хүүхэд залуучууд эзэлдэг.
Тус хороо нь Хатанбаатар Магсаржавын, Сөүлийн, Нарны зам, Тээвэрчдийн, Замчдын 1, 2, Энхтайваны өргөн чөлөө, Энгельсийн гудамж зэрэг томоохон гудамжтай.Нийт 73 орон сууц, 305 төрийн болон хувийн хэвшлийн аж ахуйн нэгж байгууллага, 17 СӨХ үйл ажиллагаа эрхэлж байна.
УБТЗ-ын Улаанбаатар өртөө, Төмөр Замын вокзал, УБТЗ-ын хэвлэх үйлдвэр, УБТЗ-ын Дохиолол холбооны 2 дугаар анги, Төмөр Замын хүүхдийн сектор, Пунцоглин хийд, Төрийн өмчийн 12 дугаар байр /Варьете/, дүүргийн татварын хэлтэс, ТОСА, Батхаан, Хабу зочид буудал ресторан зэрэг хувийн хэвшлийн аж ахуйн нэгжүүд байна. Хүнс барааны дэлгүүр болон бусад төрлийн үйлчилгээний төвүүд аж ахуйн нэгж байгууллагууд үйл ажиллагаагаа явуулж байна.
Хорооны ажлын албаны Нийслэл, дүүрэгт гаргасан амжилтаас дурьдвал:
- “Баянгол олимп-2013” Иргэдийн спортын анхдугаар их наадамд спортын 7 төрөлд амжилттай оролцож байгууллагын нэгдсэн дүнгээр “ХОЁРДУГААР” байр
- 2015 онд “Баянгол олимп” Баянгол дүүргийн Иргэдийн спортын Их наадмын “Сагсан бөмбөг”-ийн тэмцээнд “Алтан медаль”
- 2016 онд “Баянгол олимп” Баянгол дүүргийн Иргэдийн спортын Их наадмын хийн дасгал, аеробекын төрөлд “Дэд байр”
- Баянгол дүүргийн Засаг даргын Тамгын газрын 2015 оны “Шилдэг хороо”
- 2017 онд Баянгол дүүргийн Иргэдийн спортын Их наадмын софт волейболын төрөлд “Гутгаар байр”
- 2017 онд Баянгол дүүргийн Иргэдийн спортын Их наадмын аеробекын төрөлд “Тэргүүн байр”
- 2018 оны “Харшлын эсрэг хамтдаа” уриатай “Шарилжгүй Улаанбаатар-3” аянд баг хамт олноороо хошуучлан ажиллаж Улаанбаатар хотын захирагчийн ажлын албаны талархал
- “Манай хороо-Миний гудамж” аяны хүрээнд орчныхоо тохижилт, ногоон байгууламж, соёлжилтод шинэлэг ажлуудыг зохион байгуулж, хотын өнгө үзэмжийг нэмэгдүүлэхэд бодит хувь нэмэр оруулсан тул “Тусгай байр” 2018 он, Нийслэлийн Засаг дарга бөгөөд Улаанбаатар хотын захирагч
- Баянгол дүүргийн иргэдийн амьдрах ая тухтай орчин бүрдүүлэх зорилгоор зохион байгуулсан “1000 цэцэгийн мандал” аянд оролцож, “Шилдэг хороо”-гоор шалгарч, Дэд байр
- Баянгол дүүргийн хэмжээнд “Хөгжлийн бэрхшээлтэй иргэдийн спортын нөхөрсөг тэмцээн”-д “Дэд” байр
- 2018 онд Баянгол дүүргийн Иргэдийн спортын их наадмын “Сагсан бөмбөг”-ийн төрөлд “Гутгаар байр”
Хорооны Засаг дарга нар
Анх 1965 онд Октябрийн районы Төмөр замын район болж даргаар нь Дагвадорж гэдэг хүн томилогдож байсан бөгөөд түүнийг насан эцэслэхэд эхнэр Сэцэнжав нь хорооны дарга болж байсан сонин, содон түүхтэй.
